Prifysgol Wrecsam yn Cynnal Cynhadledd Fawreddog Academaidd Plismona Cymru Gyfan

Roedd Prifysgol Wrecsam yn falch o gynnal Cynhadledd Academaidd Plismona Cymru Gyfan (AWPAC) eleni, a drefnwyd mewn partneriaeth â Rhwydwaith Arloesi Cymru (WIN). Daeth y digwyddiad ag academyddion, heddlu proffesiynol, a phartneriaid ledled Cymru a thu hwnt ynghyd i rannu gwybodaeth, cryfhau cydweithio, a mynd i’r afael â rhai o’r heriau pwysicaf mewn plismona heddiw.

Gosododd yr Is-ganghellor, yr Athro Joe Yates, y naws ar gyfer y diwrnod, gan fyfyrio ar sut mae troseddu anghymesur yn effeithio ar gymunedau ymylol a phwysleisio’r angen am gynhwysiant, arloesedd, a chydweithio. Dathlodd gyfraniadau’r Brifysgol i’r maes plismona, o ddulliau sy’n ystyriol o drawma i ddatblygu sgiliau drwy bartneriaeth â Chomisiynydd yr Heddlu a Throseddu, gan ddisgrifio Cymru fel “tirwedd gyfoethog o wybodaeth” lle gall cydweithio wirioneddol ffynnu.

Clywodd mynychwyr gan yr Athro Martina Feilzer (Prifysgol Bangor) a’r Ditectif Brif Uwch-arolygydd Ross Evans (Heddlu Dyfed-Powys), cyd-gadeiryddion AWPAC, a amlinellodd y cyflawniadau hyd yma, gan gynnwys wyth prosiect wedi’u hariannu, a chynlluniau ar gyfer strategaeth newydd yn canolbwyntio ar hyder y cyhoedd, cyllid, ymgysylltu, effaith, ac integreiddio data’r heddlu i’r banc data SAIL.

Cyflwynodd y siaradwr gwadd Syr Andy Cooke QPM DL, Prif Arolygydd Cwnstabliaeth Ei Fawrhydi, araith bwerus ar adfer hyder y cyhoedd mewn plismona. Pwysleisiodd bwysigrwydd canolog arweinyddiaeth, uniondeb, ac atebolrwydd, ochr yn ochr â gwell gofal i ddioddefwyr ac ymgysylltiad cymunedol dyfnach.

Roedd y gynhadledd hefyd yn cynnwys mewnwelediadau gan swyddfa Comisiynydd yr Heddlu a Throseddu, Yr Athro Betsy Stanko OBE ar fynd i’r afael â thrais yn erbyn menywod a merched, a chyflwyniadau gan yr ymchwilwyr doethurol Emma Stones (Wrecsam) a Tegwen Haf Parri (Bangor).

Diweddodd y dydd gyda myfyrdodau gan Gomisiynydd yr Heddlu a Throseddu Gogledd Cymru, Andy Dunbobbin, a ddiolchodd i Brifysgol Wrecsam am ddarparu llwyfan ysbrydoledig ar gyfer trafodaethau mor hanfodol. Fel cynhaliwr, roedd Prifysgol Wrecsam yn falch o ddangos ei rôl wrth wraidd arloesedd, ymchwil, a phartneriaeth mewn plismona yng Nghymru.