Cyfres Seminarau Ymchwil FACE Mai 2025

Centre for People’s Justice 

Dr Karen Heald, Darllenydd mewn Ymarfer Celf Rhyngddisgyblaethol a Dr Tegan Brierley-Sollis, Darlithydd mewn Plismona, Troseddeg a Dulliau Ystyriol o Drawma oedd yn gyntaf i siarad am y Ganolfan Cyfiawnder Pobl gyffrous newydd.

Gan mai dim ond 21 diwrnod sydd ers dechrau'r prosiect, rhoddodd y tîm drosolwg o'r ganolfan ar gyfer cyd-destun:

• Wedi'i hariannu gan Gyngor Ymchwil y Celfyddydau a’r Dyniaethau (AHRC), mae'r ganolfan yn cael ei harwain gan Brifysgol Lerpwl, sy’n gweithio mewn partneriaeth â phrifysgolion Glasgow, Llundain (SAS), Sheffield, Abertawe, Ulster a Wrecsam.
• Nod y ganolfan yw dod ag academyddion, y gymdeithas sifil, y llywodraeth a'r sectorau creadigol, corfforaethol a chyfreithiol ynghyd.
• I gefnogi'r ganolfan mae'r Rhwydwaith Cyfiawnder Pobl sy'n cynnwys aelodau o sefydliadau llawr gwlad, sefydliadau cyfreithiol, llywodraethol ac elusennol yn ogystal â chydweithwyr academaidd ychwanegol o bob prifysgol a grybwyllir uchod.
• Y pedwar prif faes y mae'r ganolfan yn anelu at weithio ynddynt yw plant a phlentyndod; gwaith, lles a gofal; trais a gwrthdaro, a rôl corfforaethau mewn cymunedau

Mae rhai o nodweddion nodedig y broses yn cynnwys gweithdai sy'n cynnwys ymchwilwyr ym mhob cam o'u gyrfa (yn gynnar hyd at uwch), cynllun mentora ar gyfer ymchwilwyr gyrfa gynnar, y nod i 80% o'r holl gyllid fynd i sefydliadau llawr gwlad a grwpiau llywio cymunedol ar gyfer pob un o'r pedwar maes gwaith a nodwyd.

Mae'r tîm wedi nodi pum gwerth craidd a ddisgrifiwyd fel "personoliaeth ac ysbryd y ganolfan":

• Grymuso pobl
• Dangos Gofal
• Meithrin Ymddiriedaeth
• Ysgogi Gweithredu
• Ysbrydoli Newid

Cwpl o nodweddion allweddol eraill y ganolfan yw'r dull seiliedig ar drawma sy'n cael ei gynnwys ym mhopeth y mae'r ganolfan yn ei wneud, gyda lens ar drawma sefydliadol/unigol/rhyng-genhedlaeth a chymdeithasol, ochr yn ochr â'r dulliau ymchwil creadigol a'r methodolegau rhyngddisgyblaethol. Gyda thri artist preswyl dros gyfnod y prosiect pum mlynedd, bydd amrywiol allbynnau'n cael eu defnyddio gan gynnwys ffilm, amlgyfrwng a gwrthrychau perfformiadol gyda chydweithio a chyd-greu wedi'u plethu i'r ganolfan. 

Edrychwn ymlaen at ddilyn y daith.

Cynhadledd Peirianneg Bŵer Prifysgolion Rhyngwladol

Rhannodd Dr Yuriy Vagapov ei brofiad o gyflwyno dau bapur yn y 59fed Gynhadledd Peirianneg Bŵer Prifysgolion Rhyngwladol (UPEC) yng Nghaerdydd ym mis Medi 2024. 

Gyda'r gynhadledd gyntaf yn digwydd ym 1965, UPEC yw'r gynhadledd peirianneg drydanol hynaf yn Ewrop. Rhannodd Yuriy fod y gynhadledd flaenllaw hon yn cael ei pharchu'n fawr ac yn gyfle rhwydweithio gwych, fodd bynnag, fel gyda llawer o ddigwyddiadau ar raddfa fawr, mae wedi teimlo effeithiau hirdymor y pandemig byd-eang yn sicr a newid yn y ffordd y mae pobl yn dewis ymgynnull ar gyfer digwyddiadau o'r fath. 

Yn ystod 2024, cyflwynodd Yuriy ddau bapur:

• Profi prototeip o dechnoleg gwyntyll wedi'i yrru gan ymyl ar gyfer gyriant trydanol awyrennau cyflym.
  Mae'r papur hwn yn ymwneud â thechnoleg gwyntyll FAST sef datblygiad math newydd o wyntyll ar gyfer hedfan trydanol cyflym. Prosiect gwyntyll drydan arloesol â gwthiad uchel sy'n cael ei arwain gan Dr Robert Bolam yma ym Mhrifysgol Wrecsam. Dysgwch fwy.

• Dysg ymarferol rheoli motor ar sail DSP ar gyfer myfyrwyr peirianneg. 
  Gyda datblygiadau digidol mewn peirianneg fodern, mae'n aml yn ofynnol i fyfyrwyr wybod sut i raglennu a chodio. Yn flaenorol, byddai hyn wedi bod yn ofyniad i fyfyrwyr cyfrifiadura yn hytrach na gofyniad i fyfyrwyr peirianneg. Mae papur Yuriy yn trafod yr offer sydd ar gael nawr i helpu myfyrwyr peirianneg i osgoi rhaglennu a chodio.
  

Cynhelir y 60fed UPEC ym Mhrifysgol Brunel Llundain o 2il - 5ed Medi 2025, dysgwch fwy.

Yr Atmosffer a Theithio Awyr
Yn olaf roedd Dr Robert Bolam, Darllenydd mewn Peirianneg Awyrenegol a roddodd fewnwelediad diddorol i'r atmosffer a theithio awyr.

Oeddech chi'n gwybod bod atmosffer y ddaear sy'n cynnal yr holl fywyd hysbys yn y bydysawd yn ymestyn dim ond 19 milltir o lefel y môr?

Mae'r atmosffer yn cynnwys pum 'haen': troposffer, stratosffer, mesosffer, thermosffer ac ecsosffer, pob un â thymheredd amrywiol. O ran hediadau masnachol, yr optimwm yw uchder hedfan uwch sy'n lleihau llusgo ac yn llosgi llai o danwydd. Ar hyn o bryd mae hediadau'n gweithredu yn y troposffer uchaf a'r stratosffer isaf.

Mae rhai o'r ffeithiau sy'n ysgogi meddwl a rannodd Rob yn cynnwys:

• Peirianneg a achosodd gynhesu byd-eang a bydd peirianneg yn darparu'r atebion, fodd bynnag mae hyn yn cael ei yrru gan ewyllys wleidyddol.
• Roedd yna 38 miliwn o hediadau masnachol y llynedd, ond nid yw awyrennau yn cael yr effaith fwyaf ar gynhesu byd-eang (mae ceir a ffatrïoedd yn cael mwy o effaith). Mae awyrennau yn cyfrannu at oddeutu 2.5% o gyfanswm yr Allyriadau CO2.
• Ar hyn o bryd mae peiriannau jet yn llai na 50% effeithlon, gyda'r gwastraff yn mynd i'r atmosffer.
• Mae llwybrau anwedd o beiriannau jet yn cyfrannu at nwyon cynhesu tŷ gwydr gyda chrisialau'n rhwystro'r haul. Mae gan yriant hydrogen, sy'n cael ei archwilio ar hyn o bryd fel dewis arall mewn hedfan masnachol, yr anfanteision o gynhyrchu llwybrau anwedd, ochr yn ochr â'r angen iddo gael ei storio ar -256˚ sy'n gofyn am danciau adenydd wedi'u cynllunio'n arbennig.

Tynnodd Rob sylw at yr heriau presennol sef lleihau llosgi tanwydd ffosil, cynnal neu wella economeg teithio jet cyfredol ac integreiddio â seilweithiau awyrennau presennol. Siaradodd Rob am y dewis arall posibl sy'n cael ei archwilio a sut mae prosiect FASF-Fan wedi dangos achos cymhellol dros dechnoleg wedi'i gyrru gan ymyl i'w defnyddio mewn awyrennau mwy gan ei bod yn cynnig dewis arall cryno, effeithlon a phwysau ysgafn i beiriannau jet gwyntyll fach. Mae'n cynnig tymereddau craidd is na pheiriant jet ac mae'n haws i'w fonitro a'i reoli, mae'n dawelach ac yn cynnig gwerthoedd llawer mwy o wthiad penodol. Mae Rob a'i gydweithwyr yn gweithio gyda diwydiant a phartneriaid i fodelu dyfais gyriant effeithlon wedi'i gyrru gan ymyl sydd â gwthiad uchel, cyflymder uchel a sero allyriadau. 

Newyddion cyffrous!