Ymchwilwyr mewn Peirianneg Hydrogen a Deunyddiau Cyfansawdd wedi’u penodi fel rhan o brosiect Canolfan Peirianneg ac Opteg Menter Prifysgol Wrecsam
Dyddiad: Dydd Llun, Mai 19, 2025
Mae dau ymchwilydd mewn Peirianneg Hydrogen a Deunyddiau Cyfansawdd wedi’u penodi ym Mhrifysgol Wrecsam, fel rhan o brosiect arloesol Canolfan Peirianneg ac Opteg Menter (EEOC) y sefydliad.
Mae Barry Johnston wedi ymuno â Phrifysgol Wrecsam fel Cydymaith Ymchwil mewn Peirianneg Hydrogen, tra bod Dr. Meysam Anamagh wedi'i benodi'n Gymrawd Ymchwil mewn Peirianneg Deunyddiau Cyfansawdd.
Bydd eu penodiadau yn chwarae rhan ganolog wrth gynnal ymchwil flaengar yn yr EEOC newydd, sy’n cael ei adeiladu ar hyn o bryd ar gampws Plas Coch y Brifysgol.
Bydd hydrogen gwyrdd hefyd yn cael ei ddatblygu ar y safle fel rhan o brosiect EEOC, diolch i osod electrolyser hydrogen fel rhan o'r gwaith adeiladu, a fydd yn cyfrannu at arferion cynaliadwy mewn diwydiant.
Wrth siarad am ei rôl newydd, meddai Barry: “Rwy’n falch iawn o fod wedi’i benodi i’r rôl, yn enwedig ar yr hyn sy’n gyfnod optimistaidd ar gyfer cynhyrchu hydrogen gwyrdd, yma yng Ngogledd Cymru.
“Bydd fy meysydd ffocws ar chwilio am gyfleoedd mewn ymchwil hydrogen a chydweithio â phartneriaid diwydiant gyda phwyslais ar ddatgarboneiddio.”
Tra bydd Meysam yn chwarae rhan allweddol wrth wneud ymchwil, cydweithio â phartneriaid diwydiant a sicrhau cyllid i hyrwyddo maes strwythurau cyfansawdd.
Cynhyrchir cyfansoddion trwy ddod â dau neu fwy o ddeunyddiau megis plastig, ffibr carbon, cerameg a gwydr ynghyd, i gynhyrchu priodweddau na all y cydrannau unigol yn unig eu cyflawni.
Fe'u defnyddir yn eang mewn awyrennau, ceir, cychod, llafnau tyrbinau gwynt ac mewn strwythurau fel pontydd oherwydd gallant fod yn ysgafnach, yn gryfach ac yn fwy gwydn na deunyddiau confensiynol.
Meddai Meysam: “Fel endid sydd newydd ei sefydlu yn y Brifysgol, mae fy rôl yn gyfle gwerthfawr i adeiladu canolfan ymchwil gyfansawdd amlbwrpas a blaengar ar y cyd.
“Yn fy rôl, byddaf yn canolbwyntio ar ddylunio, gweithgynhyrchu a gwerthuso strwythurau cyfansawdd – ac yn benodol, mae fy ymchwil gyfredol yn canolbwyntio ar ddyluniadau newydd ar gyfer tanciau cyfansawdd hydrogen a ddefnyddir mewn cymwysiadau modurol ac awyrofod.
“Y nod trosfwaol yw datblygu tanciau hydrogen mwy cynaliadwy ar gyfer cymwysiadau yn y dyfodol, gan gynnwys awyrennau a cherbydau.”
Ychwanegodd Richard Day, Athro Peirianneg Cyfansoddion a Dirprwy Is-Ganghellor Ymchwil ym Mhrifysgol Wrecsam: “Rydym yn falch o groesawu Barry a Meysam i'r Brifysgol.
“Mae'r ddau yn dod â phrofiad ymchwil helaeth gyda nhw yn eu meysydd – ac rwy'n hyderus y bydd pob un ohonynt yn chwarae rhan allweddol wrth gynnal ymchwil flaengar, yn ogystal â gweithio gyda phartneriaid diwydiant, fel rhan o'n prosiect Canolfan Peirianneg ac Opteg Menter.”