Dr Liz Cade

Ar hyn o bryd, mae Liz yn brif ddarlithydd iechyd perthynol, gan ganolbwyntio’n benodol ar ddatblygu ymchwil strategol a chynorthwyo cydweithwyr academaidd iechyd perthynol i feithrin capasiti a chynnyrch.

Yn gynnar yn 2020, camodd Liz i rôl arweinydd proffesiynol a phrif ddarlithydd yn y maes Therapi Galwedigaethol, gan ganolbwyntio’n bennaf ar astudiaethau israddedigion cyn-cofrestru. Roedd ganddi gyfrifoldebau strategol a gweithredol dros reoli’r maes ac mae wedi cynorthwyo ôl-raddedigion iechyd perthynol gyda modiwlau ymarfer uwch a goruchwyliaeth ymchwil.

Mae Liz wedi bod yn gysylltiedig â datblygu a chyflwyno’r rhaglen Therapi Galwedigaethol ers 2004 ac mae wedi bod yn gysylltiedig â cheisiadau ailddilysu llwyddiannus, achredu a chomisiynu contractau. Mae hi’n falch o fod wedi arwain rhaglen a lwyddodd i ennill sgôr uchel am fodlonrwydd myfyrwyr a chyflogadwyedd. Mae’n aelod proffesiynol o Goleg Brenhinol y Therapyddion Galwedigaethol ac mae wedi cofrestru gyda’r Cyngor Proffesiynau Iechyd a Gofal.

Yn 2021, enillodd Liz Ddoethuriaeth mewn Gwyddor Iechyd gyda Phrifysgol Cymru ar ôl llwyddo i gwblhau ymchwil yn ymwneud â gwytnwch, gwahaniaeth unigol ac entrepreneuriaeth ar gyfer myfyrwyr mewn lleoliadau lle nad yw’r proffesiwn wedi ennill ei blwyf eto. Mae wedi cyhoeddi gwaith yn y British Journal of Occupational Therapy.

Cymhwysodd Liz ym 1987 ac mae wedi gweithio’n glinigol mewn lleoliadau iechyd corfforol ac iechyd meddwl yn awdurdodau iechyd Lerpwl a Chilgwri. Ym 1989, symudodd i’r maes gofal cymdeithasol a bu’n gweithio i Gyngor Bwrdeistref Cilgwri am 14 mlynedd a hefyd i Gyngor Swydd Gaer, cyn symud i rôl addysgol. Rhwng 1996 a 2001, ysgwyddodd rôl fel ymgynghorydd therapi mewn ymgyfreitha personol.

Mae maes ei harbenigedd clinigol yn ymwneud ag unigolion a chanddynt anabledd hirdymor, ynghyd â hwyluso annibyniaeth yr unigolion hynny yn bennaf trwy addasu cartrefi, darparu tai hygyrch, adsefydlu a darparu cyfarpar. Yn aml, mae gan aelodau’r grŵp hwn anghenion cymhleth oherwydd salwch a chlefyd cronig, ac maent yn elwa ar gael gwared â rhwystrau sy’n eu hatal rhag byw bywydau diogel ac ystyrlon. Mae Liz yn danbaid dros wyddorau galwedigaethol a’r gelfyddyd a’r wyddoniaeth sy’n perthyn i fyw-bob-dydd, yn ogystal ag iechyd y cyhoedd a lleihau anghydraddoldeb trwy oresgyn rhwystrau galwedigaethol.

Roedd Liz yn mwynhau mynd â myfyrwyr ar leoliad pan oedd yn glinigydd, ac yn 2004 ymgymerodd â rôl darlithydd ymarferydd ar y radd Therapi Galwedigaethol yma ym Mhrifysgol Wrecsam. Yn 2006 ysgwyddodd Liz rôl amser llawn yn y byd addysg ac mae wedi cynorthwyo’r tîm addysgu academaidd ochr yn ochr â’i rôl addysgu. Mae wedi cynorthwyo’r arweinydd addysg ymarfer i ddatblygu lleoliadau newydd ac amrywiol lle gall ein myfyrwyr gael profiad gwaith drwy gydol eu hyfforddiant. Yn awr, mae’n cynorthwyo cydweithwyr iechyd perthynol i ddatblygu ymchwil.

Mae Liz yn addysgwr hynod brofiadol sydd wedi bod yn gysylltiedig â datblygu’r rhaglen Therapi Galwedigaethol ers iddi gael ei rhoi ar waith yn 2004, a hefyd mae wedi mynd ati i ddilysu’r cwricwla newydd, yn cynnwys bodloni’r safonau sy’n ofynnol gan y Brifysgol a chyrff rheoleiddio proffesiynol. Mae wedi dal swyddi fel arholwr allanol gyda Phrifysgol Brunel, Prifysgol Derby, Prifysgol Caledonian Glasgow a Phrifysgol Ulster oddi mewn i raglenni therapi galwedigaethol (rhaglenni cyn-cofrestru ac ôl-radd fel ei gilydd).

Mae Liz yn mwynhau byw yn y wlad gyda’i theulu. Mae’n berchen ar geffyl y mae’n cystadlu gydag ef, a hefyd mae ganddi ddau sbaniel bywiog, gwenyn a rhywfaint o ieir.