Lynne Wheeler

Dechreuodd fy niddordeb proffesiynol mewn iechyd meddwl yn 1995 pan gefais swydd fel cynorthwyydd nyrsio yn yr uned iechyd meddwl cleifion mewnol a oedd newydd agor (ar y pryd!) yn Wrecsam, Llwyn y Groes. Oherwydd fy mhrofiad personol i ac aelodau o’r teulu o anawsterau iechyd meddwl, buan y gwnaeth y swydd hon i mi sylweddoli fy mod wedi dod o hyd i yrfa yr oeddwn yn angerddol i’w dilyn, felly ym 1998, dechreuais fy hyfforddiant nyrs iechyd meddwl gyda Phrifysgol Bangor. Ar ôl cymhwyso, bûm yn gweithio yn y Gwasanaethau Defnydd Sylweddau yn Wrecsam tan 2013; maes ymarfer yr wyf yn falch o fod wedi gweithio ynddo ac fe wnes i gyfarfod â llawer o unigolion ysbrydoledig ar hyd y ffordd. 

Symudais wedyn i weithio o fewn Gofal Sylfaenol Iechyd Meddwl yn Wrecsam a chanfod fy niddordeb mewn gwaith grŵp. Nid oes dim byd tebyg â dod â grŵp o bobl ynghyd o gefndiroedd amrywiol, a gwylio’r cysylltiadau’n datblygu o ddealltwriaeth ar y cyd o anawsterau bywyd. Yn ystod y cyfnod hwn yn fy mywyd y darganfyddais werth ymwybyddiaeth ofalgar a hunan-dosturi. Dechreuais ar daith bersonol gydag ymarfer ymwybyddiaeth ofalgar dyddiol, ac ar ôl pedair blynedd o wreiddio’r arfer hwn yn fy mywyd fy hun, dechreuais Radd Meistr mewn Dulliau Seiliedig ar Ymwybyddiaeth Ofalgar gyda Phrifysgol Bangor yn 2017. Hunanethnograffeg hynod bersonol oedd fy nhraethawd ymchwil o fy mhrofiad fel menyw hoyw dosbarth gweithiol yn dod yn athrawes ymwybyddiaeth ofalgar.

Cefais swydd fel darlithydd nyrsio iechyd meddwl yma yn y brifysgol ym mis Ionawr 2023 sy'n dod â fy nghariad at bob peth iechyd meddwl a gweithio gyda grwpiau ynghyd. Rwy'n addysgu ar y modiwlau Hybu Ymddygiad Iach a Bod yn Agored i Niwed mewn Cymdeithas, yn ogystal â'r modiwlau Gofal Acíwt a Chronig ar draws yr Oes mewn Iechyd Meddwl a Chydlynu Cyfannol Gofal Cymhleth mewn Iechyd Meddwl, ar gyfer y rhaglenni BN, MSc, a Rhan Amser.

Rwy’n angerddol am godi lleisiau’r rhai o grwpiau a dangynrychiolir mewn addysg a gofal iechyd, gyda chysylltiad penodol â phobl o gefndiroedd economaidd-gymdeithasol isel a’r gymuned LHDT. Mae gweld rhywun "fel chi" mewn swyddi pwerus canfyddedig yn hanfodol gan ei fod yn creu ymdeimlad o berthyn ac ysbrydoliaeth i'r rhai ohonom o gymunedau ymylol. 

Y tu allan i’r gwaith, fe welwch fi’n treulio amser gyda fy mab ysbrydoledig, fy nghi, a’m teulu ehangach. Rwyf wrth fy modd yn gwersylla a cherddoriaeth, yn enwedig cerddoriaeth sy'n fyw ac yn uchel! Mae gen i chwaeth eclectig iawn! Un o fy hoff benwythnosau o’r flwyddyn gerddorol yw gŵyl Focus Wales yn Wrecsam.