Dr Ruth Slater, Deon newydd Ysgol Fusnes Prifysgol Wrecsam, ar drên i Lundain yn ddiweddar gyda chyd-sylfaenydd Moneypenny, Rachel Clacher
Wrth i ni ddathlu Diwrnod Rhyngwladol y Merched 2026, mae Prifysgol Wrecsam yn falch o amlygu’r arweinyddiaeth, uchelgais a'r cydweithio sy’n helpu i lywio dyfodol ein rhanbarth.
Yn gynharach y mis hwn, teithiodd Dr Ruth Slater, Deon newydd Ysgol Fusnes Prifysgol Wrecsam, i Lundain ynghyd â’i chydweithwyr a phartneriaid i godi proffil uchelgais Cyngor Bwrdeistref Sirol Wrecsam i wella amlder gwasanaethau rheilffordd rhwng Wrecsam a’r brifddinas o fis Rhagfyr 2026.
Byddai gwasanaeth mwy rheolaidd a dibynadwy i Lundain yn drawsnewidiol ar gyfer busnesau ar draws Wrecsam a’r rhanbarth ehangach. Byddai cysylltedd wedi’i gryfhau yn galluogi i’n partneriaid, myfyrwyr a staff ymestyn eu rhwydweithiau, denu buddsoddiad a chynhyrchu cyfleoedd newydd sydd o fudd uniongyrchol i Ogledd Cymru. Ar gyfer ysgol fusnes fodern sy’n ymroddedig i dwf rhanbarthol, mae cysylltedd yn fwy na chyfleustra. Mae’n gatalydd ar gyfer arloesedd a menter.
Ar yr 2il o Fawrth, yn ystod y daith i Lundain, fe wnaeth Ruth gwrdd â Rachel Clacher, cyd-sylfaenydd Moneypenny. Cynhaliwyd y cyfweliad ar y trên wrth i ni deithio tua'r de, lle cawsom groeso hyfryd gan WSMR. Darparodd y sgwrs gyfle addas i fyfyrio ar brofiadau Rachel fel dynes ifanc mewn busnes a dathlu Diwrnod Rhyngwladol y Merched.
Siaradodd Rachel yn onest am ei gyrfa gynnar, o weithio fel gweinyddes yn Llundain ar ôl y brifysgol i gamu mewn i fyd prysur Cysylltiadau Cyhoeddus. Gan weithio i ddwy o ferched ysbrydoledig mewn asiantaeth yn Acton, dysgodd bwysigrwydd hyblygrwydd, gwaith tîm a gwydnwch yn gyflym. Er nad oedd hi’n gwybod llawer am gysylltiadau cyhoeddus i ddechrau, cofleidiodd natur anrhagweladwy trefnu digwyddiadau a pherfformiadau cyntaf proffil uchel, gan ennill profiad ymarferol a fyddai’n sail i’w llwyddiant entrepreneuraidd yn ddiweddarach.
Nid yw ei llwybr gyrfa wedi bod yn unionlin. O gysylltiadau cyhoeddus llawrydd i weithio gydag Achub y Plant yn Zimbabwe ac yn ddiweddarach symud i farchnata theatr yng Nghaer, datblygodd Rachel feddylfryd sy’n ymarferol ac yn canolbwyntio ar atebion. Ychwanegodd pob profiad at ei hyder a'i gallu, gan ei harwain hi a'i brawd yn y pen draw i nodi bwlch yn y farchnad ar gyfer gwasanaeth ateb ffôn mwy personol a dibynadwy. Daeth y syniad hwnnw'n Moneypenny, sydd bellach yn fusnes a gydnabyddir yn fyd-eang.
Gan fyfyrio ar ei thaith, rhannodd Rachel fewnwelediadau pwerus ar gyfer darpar entrepreneuriaid ledled Gogledd Cymru.
“Mae yna bobl sy’n gweithredu a phobl sydd ddim yn gweithredu. Roeddwn i eisiau gweithredu.”
Pwysleisiodd na ddylai amseru fyth fod yn rhwystr.
“Nid oes amser cywir i newid gyrfa neu ddechrau gyrfa newydd.”
Roedd Rachel hefyd yn agored ynghylch yr heriau mae hi wedi’u hwynebu fel entrepreneur benywaidd, gan gynnwys cael ei diystyru neu gael pobl yn ei chamgymryd am gynorthwyydd ei brawd mewn cyfarfodydd. Yn hytrach na gadael i'r profiadau hyn ei dal yn ôl, fe'u defnyddiodd fel cymhelliant, gan brofi y gellir troi ymwybyddiaeth o ragfarn yn fantais strategol.
Yn ganolog i’w llwyddiant mae ei ffocws di-baid ar ansawdd a diwylliant. Mae hi’n priodoli llawer o dwf Moneypenny i ddeall a gwerthfawrogi ei gweithlu, gan ofyn yn rheolaidd, “Sut beth yw gweithio yn y sefydliad hwn?”
I Rachel, mae datblygu busnes gwydn yn golygu buddsoddi mewn pobl, creu amgylcheddau cefnogol a chydnabod bod arloesedd yn dod o dimau ymgysylltiedig sy'n teimlo eu bod yn cael eu gweld a'u clywed.
Wrth i ni nodi Diwrnod Rhyngwladol y Merched 2026, mae ymweliad Ruth â Llundain yn symboleiddio mwy na chysylltiadau rheilffordd gwell. Mae’n adlewyrchu uchelgais ar y cyd i amlygu llais Wrecsam yn genedlaethol, hyrwyddo arweinwyr benywaidd a chreu cyfleoedd diriaethol ar gyfer ein myfyrwyr, partneriaid a busnesau rhanbarthol.
Yn Ysgol Fusnes Prifysgol Wrecsam, rydym yn parhau yn ymrwymedig i rymuso’r genhedlaeth nesaf o arweinwyr, gan eu hannog, fel mae Rachel yn ei gynghori, i weithredu, cofleidio heriau a datblygu sefydliadau sy'n cael effaith ystyrlon.