Mae Prifysgol Wrecsam wedi anrhydeddu dau unigolyn arall sydd wedi gwneud eu marc fel pencampwyr Gogledd Cymru ar y llwyfan cenedlaethol a rhyngwladol

Dyddiad: Dydd Mercher, Ebrill 1, 2026

Yn ystod ei seremonïau yr wythnos hon, mae Prifysgol Wrecsam wedi dyfarnu Cymrodoriaethau Er Anrhydedd i: 

• Bryn Williams, y cogydd a’r perchennog bwyty o fri rhyngwladol, sy’n cael ei gydnabod am ei gyfraniad i dwristiaeth, lletygarwch a’r gymuned ehangach.
• Joanna Knight OBE – busneswraig a chyn Brif Weithredwr y cwmni Wrecsamaidd Moneypenny – sy’n cael ei chydnabod am ei chyfraniad i fusnes, diwylliant a’r gymuned.

Mae Prifysgol Wrecsam yn dyfarnu Cymrodoriaethau Anrhydeddus i unigolion a grwpiau sy’n dangos ymrwymiad sylweddol i’r Brifysgol a’r gymuned ehangach.

Daw Bryn o Ddinbych, ac mae wedi mwynhau gyrfa amrywiol a’i harweiniodd i feithrin ei sgiliau mewn rhai o geginau enwocaf Llundain, gan gynnwys rolau o dan Marco Pierre White yn The Criterion a Michel Roux yn Le Gavroche, cyn treulio pedair blynedd fel uwch-gogydd cynorthwyol yn The Orrery.
Daeth Bryn yn Chef Patron Odette’s yn Llundain yn 2008, gan arwain y bwyty hyd at ei werthiant yn 2024. Mae bellach yn arwain Porth Eirias, bwyty, caffi a bar ar lan y môr yng Ngogledd Cymru, sy’n cynnig profiad bwyta modern, hamddenol gyda golygfeydd arfordirol trawiadol ac sy’n arddangos cynnyrch gorau Cymru, wedi’i ffynonellu’n lleol lle bo modd.

Mae ei waith rhyngwladol yn cynnwys agor bwyty yn The Cambrian Hotel yn yr Alpau Swisaidd yn 2020, ac yna’r Touring Club yng Nghaerdydd yn 2023. Mae Porth Eirias a’r Touring Club ill dau wedi ennill y Michelin Bib Gourmand.

Yn 2025, lansiodd Bryn ei bumed bwyty yn Theatr Clwyd eiconig yng Ngogledd Cymru, gan barhau i hyrwyddo cynnyrch lleol a bwyd modern sy’n canolbwyntio ar gynhwysion.

Wrth dderbyn yr anrhydedd, dywedodd Bryn:

“Rwy’n falch iawn o gael fy nghyflwyno’n Gymrawd Anrhydeddus Prifysgol Wrecsam. Mae cael eich cydnabod gan sefydliad sy’n gwasanaethu eich ardal yn wych.

Mae bwyd wastad wedi bod yn angerdd i mi, ac rwyf wedi bod yn ffodus i weithio gyda rhai pobl anhygoel dros y blynyddoedd.

Mae gallu rhoi rhywbeth yn ôl a chreu cyfleoedd gwaith i bobl ar draws Gogledd Cymru yn deimlad bendigedig.”

Mae Bryn wedi cyhoeddi tair llyfr, gan rannu rhai o’i hoff ryseitiau, ac mae wedi ymddangos yn eang ar deledu a radio, gan ennill sylw gyntaf ar Great British Menu ar BBC Two, lle enillodd y rownd ranbarthol ddwywaith a choginio yng ngŵyl ben-blwydd 80 oed y Frenhines Elizabeth II.
Yn siaradwr Cymraeg rhugl, mae wedi ymddangos yn helaeth ar S4C. Anrhydeddwyd Bryn hefyd gan Orsedd y Beirdd yn Eisteddfod Genedlaethol Cymru 2013 yn ei dref enedigol, Dinbych, pan gafodd ei ddewis yn aelod o Urdd Ddruidiaethol yr Eisteddfod.

“Mae gan Gymru, ac yn enwedig Gogledd Cymru, gymaint i’w ddathlu ar y llwyfan rhyngwladol – o dwristiaeth a busnes i’n treftadaeth a’n diwylliant cyfoethog – ac rwy’n angerddol am fod yn llysgenhadwr i’m gwlad a’i thraddodiadau,” meddai

Rwyf wedi cael cymaint o brofiadau gwych yn fy ngyrfa ac rwyf eisiau gwneud fy rhan i helpu i arddangos yr hyn sydd gennym i’w gynnig yma yng Ngogledd Cymru.”

Mae Joanna yn ymrwymedig iawn i’r lle y mae’n ei alw’n gartref, ac mae wedi dangos yn gyson sut y gall llwyddiant masnachol greu budd cymunedol gwirioneddol.

Mae ei gyrfa’n ymestyn ar draws rolau arweinyddiaeth uwch yn y sectorau cyhoeddus, preifat a gwirfoddol, yn fwyaf nodedig fel Prif Weithredwr Moneypenny. Yn ystod ei chyfnod yn y rôl, roedd yn cael ei hystyried yn allweddol i dwf rhyfeddol y cwmni, gan helpu i raddfa’r busnes tra’n diogelu ei ddiwylliant a’i werthoedd sy’n rhoi pobl yn gyntaf.

O dan ei harweiniad, daeth Moneypenny yn stori lwyddiant a gydnabyddwyd yn genedlaethol ac yn rhyngwladol, tra’n aros yn gadarn ei gwreiddiau yn Wrecsam ac yn cyfrannu’n sylweddol at yr economi leol.

Dywedodd Joanna: "Mae'n anrhydedd derbyn Cymrodoriaeth Anrhydeddus gan Brifysgol Wrecsam. Mae Wrecsam yn gartref i mi ac rwy’n ymrwymedig iawn i helpu’r ardal ffynnu, boed hynny ym myd busnes neu yn y gymuned ehangach, felly mae cael fy nghydnabod am fy nghyfraniadau yn anhygoel."

Arweiniodd Joanna hefyd y cais gwreiddiol ar gyfer Parth Buddsoddi Wrecsam a Fflint, ac mae ar hyn o bryd yn Gadeirydd y bwrdd strategol – gan gefnogi ymdrechion i ddenu buddsoddiad, creu swyddi o ansawdd uchel a chryfhau cyfleoedd economaidd hirdymor i’r rhanbarth.

Mae hi’n cadeirio cais Wrecsam am statws Dinas Diwylliant y DU, gan arwain bwrdd WCCT sy’n gyfrifol am ddatblygu’r cais nesaf a hyrwyddo uchelgais ddiwylliannol y ddinas ar lwyfan cenedlaethol.

“Mae cymaint o botensial ar draws y rhanbarth, ac mae gweithio ochr yn ochr â’r rhai sy’n hyrwyddo Wrecsam a Fflint i’r byd ehangach yn her gyffrous.”