Myfyrwyr Nyrsio ac Iechyd Perthynol yn cymryd rhan mewn cynhadledd a digwyddiad rhwydweithio un-o-fath yn y Gymraeg
Date: Dydd Gwener, Ionawr 24, 2024
Mewn un cyntaf i Brifysgol Wrecsam/Prifysgol Wrecsam, cymerodd dros 200 o fyfyrwyr Nyrsio ac Iechyd Perthynol ran mewn Diwrnod Addysg Rhyngbroffesiynol cydweithredol – gan ganolbwyntio ar y Gymraeg mewn lleoliadau gofal iechyd.
Yn dwyn y teitl 'Gofal ac Iaith, Law yn Llaw', cafodd myfyrwyr blwyddyn gyntaf ac ail flwyddyn o gampysau Plas Coch yn Wrecsam a Llanelwy, sgyrsiau gan siaradwyr gwadd am bwysigrwydd y Gymraeg mewn gofal iechyd, a manteision defnyddio'r iaith ar gyfer staff a chleifion.
Roedd y digwyddiad yn cynnwys sgyrsiau gan Fwrdd Iechyd Prifysgol Betsi Cadwaladr (BIPBC) a chynrychiolwyr y Coleg Cymraeg Cenedlaethol.
Fel un o ofynion y cyrsiau Nyrsio ac Iechyd Perthynol, mae diwrnodau rhyngbroffesiynol yn sicrhau bod myfyrwyr yn datblygu dealltwriaeth o sut y byddant yn gweithio gyda disgyblaethau eraill ar ôl cymhwyso.
Fel un o ofynion y cyrsiau Nyrsio ac Iechyd Perthynol, mae diwrnodau rhyngbroffesiynol yn sicrhau bod myfyrwyr yn datblygu dealltwriaeth o sut y byddant yn gweithio gyda disgyblaethau eraill ar ôl cymhwyso.
Yn dilyn cynhadledd y bore, llwyddodd y carfanau i rwydweithio â myfyrwyr eraill a darganfod mwy am y gwahanol ddisgyblaethau Iechyd Perthynol, yn ogystal â manteisio ar y cyfle i siarad â sefydliadau amrywiol, megis Menter Iaith, Coleg Cambria a Thiwtor Cymraeg y Brifysgol, Teresa Davies.
Roedd myfyrwyr hefyd yn gallu dysgu mwy am ddosbarthiadau a chymdeithasau Cymraeg i ymarfer yr iaith y tu allan i'r ystafell ddosbarth.
Dyma'r ail ddiwrnod rhyngbroffesiynol a gynhelir gan y Brifysgol - y cyntaf yn 2023 oedd yn canolbwyntio ar ddarparu sgiliau achub bywyd sylfaenol i fyfyrwyr. Mae diwrnod rhyngbroffesiynol pellach wedi'i drefnu ar gyfer mis Mai – ar thema diogelu mewn gofal iechyd.
Meilyr Emrys, Swyddog Iaith Gymraeg Bwrdd Iechyd Prifysgol Betsi Cadwaladr yn cyflwyno ei sesiwn ar effaith defnyddio'r Gymraeg o fewn y bwrdd Iechyd.
Meddai Jo Griffiths, myfyrwraig Nyrsio Oedolion ail flwyddyn ar gampws Llanelwy'r Brifysgol: "Mae'r cyflwyniad yn y Diwrnod Addysg Ryngbroffesiynol wedi rhoi hwb hyder i mi ddysgu'r Gymraeg ac wedi dangos ei bod yn iawn gwneud camgymeriadau wrth geisio siarad yr iaith. "Dwi wedi sylweddoli nad oes angen i mi fod yn rhugl i gael effaith."
Teresa Davies, Tiwtor Sgiliau Iaith Cymraeg ym Mhrifysgol Wrecsam, siarad â myfyrwyr.
Esboniodd Meilyr Emrys, Swyddog Cymraeg BIPBC ac un o siaradwyr y dydd bwysigrwydd digwyddiadau o'r fath.
Meddai: "Mae'r digwyddiadau hyn yn hynod o bwysig. Yr hyn yr oeddem am i'r myfyrwyr ei ddeall o'r diwrnod oedd y gall hyd yn oed defnyddio ychydig o Gymraeg wneud bywyd yn haws i gleifion mewn cyfnod sy'n gallu bod yn straen.
"Mae'n ymwneud â dod o hyd i ffordd i sicrhau bod ein cleifion yn gallu cyfathrebu'n gyfforddus ac mor naturiol â phosib.”
Yn ystod sesiwn y prynhawn, bydd myfyrwyr yn ymgymryd â gwersi bach Cymraeg, yn seiliedig ar eu gallu, gyda'r nod o gynyddu eu hyder, ac ehangu eu geirfa sy'n gysylltiedig â gofal iechyd.
Sioned Roberts, Swyddog Iaith Gymraeg Bwrdd Iechyd Prifysgol Betsi Cadwaladr, yn cyflwyno un o'r gweithdai Cymraeg i fyfyrwyr.
Roedd cyfle hefyd i fynychwyr rannu straeon am sut maen nhw wedi profi a defnyddio'r Gymraeg mewn lleoliadau gofal iechyd yn uniongyrchol, boed hynny fel staff neu glaf.
Roedd Awel Wynne-Williams, Darlithydd mewn Nyrsio Plant a threfnydd digwyddiadau wrth ei fodd gyda sut aeth y diwrnod.
Meddai: "Mae wedi bod yn fraint gweithio ochr yn ochr â Bwrdd Iechyd Prifysgol Betsi Cadwaladr a'r Coleg Cymraeg Cenedlaethol wrth i ni drafod pwnc sy'n effeithio ar gleifion a theuluoedd bob dydd yn ein cymunedau.
"Roedd y diwrnod yn ysbrydoli myfyrwyr i feddwl am y cysylltiad cryf sy'n bodoli rhwng gofal ac iaith. Diolch yn fawr iawn i bawb am eich brwdfrydedd a'ch gwaith caled wrth baratoi ar gyfer y diwrnod."
Ychwanegodd Elen Mai Nefydd, Pennaeth Datblygu Cyfrwng Cymraeg Prifysgol Wrecsam: "Mae'r diwrnod rhyngbroffesiynol hwn ar Ymwybyddiaeth o'r Gymraeg mewn Iechyd a Nyrsio Perthynol wedi bod yn llwyddiant ysgubol ac mae'n wych gweld llawer o fyfyrwyr Prifysgol Wrecsam yn mynychu'r diwrnod ac yn cael y cyfle i weithio gyda nifer o'n partneriaid allanol fel y Bwrdd Iechyd a'r Coleg Cymraeg Ceneldaethol.
"Mae diwrnod ymwybyddiaeth iaith Gymraeg fel hwn yn paratoi ein myfyrwyr ar gyfer y gweithlu yng Nghymru ac mae'n elfen bwysig o'n Strategaeth Cyfrwng Cymraeg yn y brifysgol, lle rydym wedi ymrwymo i gynnig cyfleoedd i bawb drwy'r Gymraeg ym Mhrifysgol Wrecsam."