Astudio gradd fel myfyriwr ag anableddau

Fy enw i yw Daniel Roberts ac efallai y byddwch yn fy nghofio i o’m blog diwrnod yn fy mywyd.

Rwy’n argymell i chi ddarllen hwn os nad ydych wedi gwneud hynny eisoes, ond i gyflwyno fy hun yn gryno, rwy’n astudio gradd Baglor yn y Gwyddorau mewn Datblygu Gemau Cyfrifiadurol ac mae gen i Barlys yr Ymennydd drwy leferydd a symudiad. Mae gen i gadair olwyn fodur i symud o gwmpas ynddi, a DynaVox (cymorth siarad) i’m helpu i gyfathrebu.

Penderfynais ysgrifennu’r blog hwn i’ch sicrhau chi os ydych yn fyfyriwr ag anabledd, neu os ydych o gefndir difreintiedig, bod modd i chi gyflawni gradd pan rydych yn frwd dros y pwnc. Byddaf yn egluro fy mhroses ymgeisio, fy rhesymau dros ddewis Prifysgol Wrecsam ac yn olrhain fy nghynnydd dros y blynyddoedd.

Mae Prifysgol Wrecsam wedi aros ar y brig am chwe blynedd yn olynol am gynhwysiant cymdeithasol (Times and Sunday Times Good University Guide 2024) ac mae’n cynnig gwasanaeth cynhwysiant da, sy’n helpu myfyrwyr ag anableddau dysgu a chorfforol.

Roeddwn yn teimlo’n nerfus ar y dechrau ynghylch rheoli fy amser a theithio yn ôl ac ymlaen o’r campws. Yn y pen draw profodd hyn yn haws na’r disgwyl, a’r fantais fawr o fynychu’r brifysgol yn gorfforol oedd y ffaith y gallwn egluro unrhyw broblem oedd gen i gyda fy ngwaith oherwydd fy mod yn gallu siarad yn uniongyrchol â’r darlithwyr. 

CYNGOR

Byddwn yn awgrymu eich bod yn datgan bod gennych anabledd i’r brifysgol cyn gynted â phosib. Yn bersonol, ni allaf argymell tîm Cynhwysiant Prifysgol Wrecsam yn ddigon, a gallant gael y cymorth y mae gennych yr hawl iddo ac sydd ei angen arnoch. Maent yn eich helpu i wneud cais ar gyfer DSA1, sy’n cynnig cyllid i’ch cefnogi chi gyda’ch gradd. Yn ogystal â hyn, mae’r grant yn talu am gymorth dysgu ar gyfer darlithoedd, ac mae hyn yn cynnwys cymorth gyda nodiadau, prynu monitor, argraffydd, a chaffael meddalwedd defnyddiol i helpu fy ngramadeg a darllen. 

Fel rhan o’r Radd Datblygu Gemau Cyfrifiadurol, gall myfyrwyr animeiddio eu symudiadau eu hunain drwy ddefnyddio siwt casglu symudiadau neu arddangos gemau mewn Realiti Rhithwir. Roedd hon yn weithgaredd a oedd yn amhosibl i mi gymryd rhan ynddi, ond roedd y darlithwyr yn deall hyn yn iawn, a chefais gefnogaeth fy nghyd-fyfyrwyr i gyflawni’r ddysg.

Er fy mod wedi wynebu heriau yn ystod fy nghwrs, llwyddais i ddod yn un o’r llysgenhadon myfyrwyr Grads in Games a chefais fy nghynnwys ar y rhestr fer ar gyfer Cynrychiolydd Myfyrwyr y flwyddyn yng ngwobrau’r brifysgol. Mae Grads in Games yn sefydliad dielw gwych sy’n helpu graddedigion i gael gwaith yn y diwydiant gemau a helpais hwy drwy hysbysebu eu digwyddiadau yn fy mhrifysgol.

CYNGOR

Deuthum yn un o Lysgenhadon Myfyrwyr y brifysgol, ac mae’n ffordd wych o ennill cyflog wrth ddysgu (rwy’n swnio fel un o hysbysebion Prifysgol Wrecsam!). Rydych yn cael profiad ac mae’r swydd yn cynnig hyblygrwydd o amgylch eich gradd.

Ar hyn o bryd rwy’n parhau fy astudiaethau yn Wrecsam gyda gradd Meistr ran amser mewn Datblygu Gemau Cyfrifiadurol ar ôl cyflawni 2:1 gyda fy ngwaith caled ac agwedd benderfynol. Rwy’n bwriadu cyflwyno fy ngêm fy hun ar Steam cyn bo hir, ac rwy’n teimlo’n gyffrous ynghylch y dyfodol!  

Rydym yma i’ch cefnogi chi yn Wrecsam, ac rydym yn cynnig amrywiaeth o wasanaethau cynhwysiant y gall myfyrwyr eu defnyddio.

Cofiwch fynd ati i ddysgu sut allwch fod yn rhan o’r ddysg yn Wrecsam drwy astudio naill ai gradd Israddedig neu Ôl-raddedig.