Hen nain a drodd yn fyfyrwraig a ddyfarnwyd am ei rhagoriaeth academaidd a'i hymroddiad

Dyddiad: Dydd Iau, Chwefror 27, 2025

Mae hen nain sy’n astudio am radd mewn Troseddeg a Chyfiawnder Troseddol ym Mhrifysgol Wrecsam wedi ennill gwobr am ei pherfformiad academaidd ac wedi cael effaith gyda’i hagwedd gadarnhaol ac ymroddedig.  

Yn chwe deg dwy oed, dychwelodd Helen Powell i astudio yn ddiweddarach mewn bywyd i ddilyn diddordeb gydol oes mewn troseddeg.

Er gwaethaf cydbwyso bywyd teuluol prysur, mae Helen wedi cofleidio ei hastudiaethau’n llawn, ac wedi rhagori yn ei gwaith academaidd, yn ogystal â’i hymrwymiad i’w chyfoedion a’r gymuned ehangach.

Wrth siarad ar ôl derbyn ei thystysgrif a'i gwobr, dywedodd Helen: “Mae'r wobr hon yn golygu llawer iawn i mi. Fel rhywun a gychwynnodd yn y brifysgol yn fy chwedegau, roeddwn yn bryderus ac nid oeddwn yn hollol siŵr y byddai'n iawn i mi – ond teimlaf fy mod i wedi ‘ffeindio fy hun’, fel petai, yn y brifysgol.” 

“O gynnwys hynod ddiddorol y cwrs i staff hynod gefnogol y Brifysgol, yn ogystal â fy nghyd-fyfyrwyr gwych, rwyf wedi cael fy ngwneud i deimlo bod gennyf le yma o'r cychwyn cyntaf. Mae Prifysgol Wrecsam yn lle hynod arbennig ac rydw i mor ddiolchgar i gael y cyfle hwn i ddysgu.

“Mae jyglo bywyd teuluol a phrifysgol yn heriol ar adegau ond mae’r gefnogaeth sydd gen i gan fy nheulu a hefyd fy narlithwyr gwych wedi bod yn wych. Ni allaf ddiolch digon iddynt am eu cefnogaeth.”

Ychwanegodd Dr Jo Prescott, Arweinydd Rhaglen ac Uwch Ddarlithydd mewn Troseddeg a Chyfiawnder Troseddol: Mae “Helen yn fyfyriwr rhagorol, sy’n ymgorffori ysbryd Prifysgol Wrecsam yn llwyr.

“Mae hi wedi ymrwymo'n llawn i'w hastudiaethau – yn disgleirio'n academaidd trwy ei graddau cryf a'i hymwneud cyson â darlithoedd ond hefyd yn y ffordd y mae'n cefnogi ac yn gosod esiampl ysbrydoledig i'w chyd-fyfyrwyr.  

“Mae Helen wedi dangos ymrwymiad diwyro i’w hastudiaethau a’i thwf academaidd drwy gydol ei blwyddyn gyntaf. Ni allai’r tîm Troseddeg fod yn fwy balch o Helen, sy’n dderbynnydd gwirioneddol haeddiannol o’r wobr hon.” 

• Mae Troseddeg a Chyfiawnder Troseddol ym Mhrifysgol Wrecsam yn cael ei graddio’n gyntaf yn y DU am ansawdd addysgu a phrofiad myfyrwyr yng Nghanllaw Prifysgolion Da’r Times a Sunday Times 2025; yn ogystal â rhan o faes pwnc sydd yn y safle cyntaf yn y DU ar gyfer addysgu ar fy nghwrs yn Arolwg Cenedlaethol Myfyrwyr 2024.
• Mae rhagor o fanylion am gwrs – gan gynnwys sut i gymhwyso – i'w gweld yma.