Clipiau corff-gamerâu yr heddlu i gael eu craffu gan y panel myfyrwyr gyda'r nod o wella atebolrwydd yr heddlu

Dyddiad: Gorffennaf 8, 2026

Bydd myfyrwyr Prifysgol Wrecsam yn cyfrannu at atebolrwydd yr heddlu drwy gymryd rhan mewn Panel Craffu Myfyrwyr newydd a ddatblygwyd mewn partneriaeth â Heddlu Gogledd Cymru.

Mae'r panel yn dwyn ynghyd fyfyrwyr o Blismona, Troseddeg, Seicoleg, Gwyddoniaeth Fforensig, Nyrsio Iechyd Meddwl a'r Gyfraith, a fydd yn cyfarfod teirgwaith y flwyddyn i adolygu clipiau corff-gamerâu go iawn o ddigwyddiadau heddlu a rhoi adborth ar ansawdd y plismona.

Bydd eu mewnwelediadau'n cael eu rhannu'n uniongyrchol â Heddlu Gogledd Cymru, ynghyd ag adborth gan baneli ymgysylltu cymunedol eraill, gyda'r nod o ategu gwell tryloywder ac atebolrwydd ar draws arferion plismona'r rhanbarth.

Ar hyd a lled gogledd Cymru, mae plismona'n destun sawl trefniant craffu annibynnol a luniwyd i sicrhau tegwch, tryloywder a hyder cyhoeddus. Mae paneli craffu'n archwilio pwerau gweithredol yr heddlu megis stopio a chwilio a defnyddio grym, gan sicrhau y cânt eu defnyddio'n deg, yn gymesur ac yn gyfreithlon.

Dywedodd Andy Jones, Uwch Ddarlithydd mewn Plismona, Troseddeg a'r Gyfraith ym Mhrifysgol Wrecsam: “Mae Panel Craffu Myfyrwyr y Brifysgol yn cynnig cyfle i fyfyrwyr ymgysylltu'n uniongyrchol ag enghreifftiau go iawn o weithgarwch heddlu. Drwy'r panel, bydd myfyrwyr yn adolygu clipiau fideo di-enw a wisgir ar y corff sy'n berthnasol i ddigwyddiadau'n ymwneud â phwerau'r heddlu megis defnyddio grym.

“Gall digwyddiadau gynnwys amgylchiadau lle mae'r heddlu o bosib wedi gorfod defnyddio cyffion yn ystod arestiad neu wedi rhoi tactegau arbenigol ar waith fel defnyddio gwn taser. Diben y craffu yw archwilio a yw pwerau'r heddlu wedi'u defnyddio'n briodol, yn ogystal â darparu safbwyntiau cymunedol gwerthfawr sy'n gallu llywio arferion plismona.

Mae'r fenter hefyd yn cynnig cyfle dysgu pwysig i fyfyrwyr, gan eu galluogi i ddatblygu meddwl beirniadol, sgiliau dadansoddol a dealltwriaeth o atebolrwydd o fewn gwasanaethau cyhoeddus. Drwy ddod â gweithwyr plismona proffesiynol a myfyrwyr ynghyd o amrywiol gefndiroedd academaidd, mae'r panel yn ceisio atgyfnerthu'r berthynas rhwng y Brifysgol a chymunedau lleol wrth gefnogi didwylledd a hyder cyhoeddus mewn plismona.”

Mae Prifysgol Wrecsam yn cynnig cyrsiau israddedig ac ôl-raddedig mewn Plismona Proffesiynol, Troseddeg, y Gyfraith, Gwyddoniaeth Fforensig, Nyrsio Iechyd Meddwl a Seicoleg Droseddol. Mae Clirio nawr ar agor ar gyfer lleoedd ar y cyrsiau sy'n dechrau yn nhymor yr Hydref 2026.

Dysgwch ragor yma.

Stori Joshua

Mae Joshua, 23, yn heddwas gyda Heddlu Gogledd Cymru, ac mae wedi'i leoli yn Sir y Fflint. Cwblhaodd ei radd mewn Plismona Proffesiynol ym Mhrifysgol Wrecsam yn 2024, ac mae'n rhoi cydnabyddiaeth iddi am ei helpu i sicrhau ei rôl bresennol.

"Roeddwn yn gwybod erioed fy mod i eisiau bod yn heddwas, ond pan oeddwn yn iau, roeddwn yn meddwl mai dim ond gyrru ar wib gyda'ch goleuadau glas yn fflachio oedd plismona. Fodd bynnag, dw i wedi dod i ddeall bod y rôl yn golygu helpu pobl, a gwneud penderfyniadau mewn amgylchedd sy'n newid drwy'r adeg ac sydd bob amser yn heriol.

"Mae'r heddlu'n helpu'r bobl fwyaf bregus mewn cymdeithas, a phan rydym yn gallu gwneud hynny, mae wir yn teimlo eich bod chi'n gwneud gwahaniaeth a pham mae'r swydd yn teimlo'n werth chweil.

“Helpodd y Radd Plismona Proffesiynol yn Wrecsam i fy mharatoi ar gyfer y rôl hon. Dw i'n wreiddiol o Gaernarfon, mae fy nheulu cyfan yng ngogledd Cymru, a dw i'n siaradwr Cymraeg, felly Prifysgol Wrecsam oedd fy ffefryn o bell ffordd. Roedd yn teimlo'n fwy cartrefol na'r lleill y bues i'n ymweld â nhw. Roeddwn yn hoffi'r ffaith ei bod yn brifysgol lai, ac y byddem yn cael ein haddysgu gan gyn-heddweision.

“Rhywbeth a bwysleisiodd y radd arnaf oedd pa mor bwysig yw archwilio troseddau'n drylwyr, nid dim ond neidio o un sefyllfa i'r llall. Mae'n rhoi llawer mwy o bersbectif academaidd i'r rôl blismona. Y dyddiau hyn, mae llawer mwy o atebolrwydd ar gyfer gweithredoedd yr heddlu, felly mae deall eich pwerau, o ble daw'r pwerau hynny, pam eu bod nhw'n bwysig, deall pam ei bod yn bwysig delio a thasgau'n drwyadl, a gwneud eich gwaith papur yn drwyadl, yn hanfodol. Ni chewch hynny gymaint mewn hyfforddiant plismona gweithredol. Ar y cwrs gradd, rydych yn dysgu'r safonau sy'n ddisgwyliedig yn yr heddlu o'r cychwyn cyntaf. Yn ogystal, oherwydd aseiniadau, rydych yn dysgu sut i ysgrifennu'n feirniadol, sut i ysgrifennu'n fanwl, a sut i ysgrifennu'n broffesiynol.

"Cawsom ein haddysgu hefyd am ddeall pethau fel bregusrwydd, trawma, ymarfer sy'n ystyriol o drawma a'r ochr academaidd o blismona. Bu'r radd o gymorth hefyd i mi ddatblygu sgiliau fel meddwl yn y fan a'r lle, siarad gyda phobl, a chymryd rhan mewn cyfweliadau, a'm helpodd fi i sicrhau fy swydd hyfforddiant.

“I unrhyw un sy'n ystyried astudio'r radd i ddilyn gyrfa gyda'r heddlu, buaswn 100% yn ei hargymell.

"Dw i'n mwynhau pob un eiliad o fod yn heddwas. Pob un eiliad.”

Mae lleoedd ar gael ar gyfer y Radd Plismona Proffesiynol ym Mhrifysgol Wrecsam sy'n dechrau ym mis Medi 2026. Dysgwch fwy yma.