.jpg)
Cynllun Peilot Agwedd Genedlaethol at Ymholiadau Mewn Ysgolion
Dull Cenedlaethol o Ymholi yng Nghymru (NAtES) 2026–27: Lansio blwyddyn newydd o ymholi gan ymarferwyr ar draws Gogledd Cymru
Roedd Tîm Addysg Prifysgol Wrecsam yn falch iawn o lansio’r Dull Cenedlaethol o Ymholi yng Nghymru (NAtES) ar gyfer blwyddyn academaidd 2026–27. Daeth arweinwyr ysgolion a chydweithwyr o awdurdodau lleol ledled Gogledd Cymru ynghyd, ochr yn ochr â chydweithwyr o Brifysgol Wrecsam a Phrifysgol Bangor, i ddathlu ac adeiladu ar y gwaith ymholi cyffrous sy’n cael ei wneud gan ymarferwyr ar draws y rhanbarth. Dros y flwyddyn ddiwethaf, mae 55 o ysgolion ledled Gogledd Cymru wedi cymryd rhan mewn 11 ymholiad cydweithredol sy’n canolbwyntio ar nodau gwella ysgolion.
Cefnogwyd y digwyddiad gan Dr Richard Watkins, Ann Bradshaw a Dr Emma Tiesteel o Brifysgol Wrecsam, ynghyd â Dr Lowri Jones o Brifysgol Bangor. Roedd yn gyfle i glywed yn uniongyrchol gan ysgolion am eu gwaith ymholi, rhannu profiadau a chryfhau cydweithio rhwng ysgolion, awdurdodau lleol a phrifysgolion.
Cafodd y cyfranogwyr hefyd gipolwg ar "Fodiwl Ymholi Athrawon" newydd, a ddatblygwyd i gefnogi ymarferwyr drwy gydol y broses ymholi ac i gefnogi datblygiad parhaus ymholi gan ymarferwyr ledled Cymru.
Roedd y digwyddiad yn cynnig cyfleoedd gwerthfawr i gydweithwyr feithrin cysylltiadau ar draws y rhanbarth, rhannu’r hyn a ddysgwyd ac archwilio sut y gall ymholi gan ymarferwyr barhau i ddatblygu mewn gwahanol gyd-destunau. Dechrau gwych i flwyddyn arall o gydweithio rhwng ymarferwyr, awdurdodau lleol, prifysgolion a phartneriaid ledled Cymru.
Content Accordions
-
Newyddion Chwefror 2026
Tîm Addysg ac Astudiaethau Plentyndod Prifysgol Wrecsam i arwain Cynllun Peilot Agwedd Genedlaethol at Ymholiadau Mewn Ysgolion Llywodraeth Cymru
Dyfarnwyd cyllid gan Lywodraeth Cymru i Brifysgol Wrecsam i arwain y Prosiect Peilot Agwedd Genedlaethol at Ymholiadau mewn Ysgolion (NAtES).
Bydd y cynllun peilot cenedlaethol yn atgyfnerthu rôl ymholiad proffesiynol ac Ysgolion fel Sefydliadau Dysgu mewn gwella ysgolion ar draws Cymru, gan archwilio sut mae prifysgolion, awdurdodau lleol a grwpiau o ysgolion yn gallu gweithio gyda’i gilydd er mwyn datblygu agweddau mwy cyson a chynaliadwy tuag at arfer yn seiliedig ar dystiolaeth, dysgu proffesiynol a gwella ysgolion.
Mae Prifysgol Wrecsam wedi’i phenodi fel y sefydliad arweiniol dros bob un o’r saith o brifysgolion yng Nghymru sy’n rhan o’r prosiect. Yn y rôl hon, bydd y Brifysgol yn goruchwylio darpariaeth, cefnogaeth a chydweithredu cenedlaethol ar draws y sector addysg, ac arwain gwerthusiad o’r cynllun peilot. Mae’r prosiect yn adeiladu ar waith cenedlaethol blaenorol, gan gynnwys y Prosiect Ymholiad Proffesiynol Cenedlaethol (PYPC) a’r prosiect Gwreiddio Ymchwil ac Ymholiad mewn Ysgolion (EREiS).
Mae’r gwaith cydlynu a gwerthuso cenedlaethol yn cael ei arwain gan Dr Sue Horder, Dr Richard Watkins, Dr Emma Tiesteel, Lisa Formby, yr Athro Carl Hughes ac Ann Bradshaw o dîm Addysg ac Astudiaethau Plentyndod Prifysgol Wrecsam, gyda darpariaeth sy’n ffocysu ar ysgolion yn cael ei gefnogi gan Dr Karen Rhys Jones, Dr Kelly Smith a Dafydd Rhys.
Mae Cynllun Peilot NAtES yn adlewyrchu ymrwymiad Llywodraeth Cymru i adeiladu system addysg sy’n seiliedig ar dystiolaeth ac mae’n gosod Prifysgol Wrecsam ar y blaen o ran gwaith cenedlaethol i gefnogi gwella ysgolion a dysgu proffesiynol ar draws Cymru.
